عمر وذكريات
####
لما العمر بيمر
وبيقطع الستين
بيصر بعدو كهل
وبيخف نظر العين
وضهرو بينحني
بيصير يتذكر
أيامو المضت
وشو بهالعمر
حقق باحلامو
بيتذكر عروسة الزيت
وخبزة التنور
والميزر
وعجنات أمو
ومنقوشة الزعتر
بيتذكر عنزة الجيران
وسخيلتا خلفا
وقرقور أبيض
مع الراعي خلف أمو
بيتمختر
بيتذكر
تلاميذ مدرستو
وقديش كان خجلان
من بوسة معلمتو
بيتذكر بيدر قمح مليان
وجارو ابو سلمان
عالمرج
عم يدرس الحنطة
وقديش حطو عالمرج
ونطوط النطة
بيتذكر الباطوس
وقشرة البرغل
ودقة الحنطة بالجرن
بيتذكر البستان
وقديش تعمشق عالشجر
تيحوش التين
والرمان
ويقطف ورد وبنفسج
بيتذكر عرزال
بو اسماعيل
عاكتف السفح
بيراقب بنيات المدرسة
بيحلم
بوحدة قاعدة حدو
بيذكر التلجات
وطيور
متدور على كسرة خبز
بيتذكر
لما أجا المختار
تيخبرو
أنو صار كبير
وعالجيش يضب اغراضو
بيتذكر
دمع أمو ودعوة البابا
وخياتو
ترجع يا قلبي سالم
وراية نصر حامل
بدياتو
بيتذكر
أول إجازة
وفرحة الخلان
والدبكة عاباب بيتو
رفقات مع خلان
بيتذكر
قديش كان خجلان
لما قعد مع بيت عمو
عم يطلب عروس
تيكمل حياتو
ويصير عندو ولاد
ولما توظف
طار من الفرحة
ولما بنا بيتو عكتف التل
زرع حولو الورد
المنتور ولجوري وفل
بيتذكر لما العمر
مرق وماحس
بلشت مشاكل
تشيل من الذاكرة
الأفراح وتزرع الأحزان
أمو وبيو سافرو لبعيد
وجارو ورفقاتو
وصار المرض عنوان
بحياتو
ولادو تغربو عنو
وماعاد في جمغات عالتلة
والستين غير الأحوال
من شب يتغزل
لاختيار محمل بأحزان
بالكاد بيكتب قصيدة
عن زمن ولى
وشي كان أو ما كان
وبيحكي لأحفادو
إذا اجتمعو
عن بطولاتو
والصبايا تغازلو من زمان
وياحصرتي
عاهالعمر
ومن قلة الخلان
####
د. موفق محي الدين غزال
اللاذقية سوريا
تعليقات
إرسال تعليق