🌹🌹🌹🌹🌹🌹🌹 الطيابة 🌹🌹🌹🌹🌹🌹🌹
مهما نحكي ف الحكاية
مهما نوصف الكلام
حتى لو مليون رواية
نقطة ف بحور الآلام
دي الطيابة لينا آيه
وإحنا عايشين والسلام
يعني لما نكون بنضحك
والعيون جنبك سهام
سهم يرشق جوه قلبك
يقفل الفرحة بصمام
يبقى كل الكون قصادك
هم متغلف ظلام
يعني لما نجيب في سيرتك
يبقى ذم ومش تمام
أصل دايما الطيابة
كَل حقوقها اللئام
ايوة يابني الدنيا غابة
والضباع عاملين زحام
هي كلمة الطيابة
في القاموس كان صفحة كام
عد تاني مش هتلقى
غير خيانة وإنتقام
أصل دنيا الناس ياسيدي
كل حاجة نقول بكام
واللي يدفع بس مرة
عاش يطاطي للختام
والنفاق والكدب يعني
أعلى حاجة في المقام
اللي عايز بس يوصل
لبسوه مليون لجام
يعني ياخي سهل جدا
تبني قصرك من الحرام
وإنت طبعا بالطيابة
ماشي في الدنيا بهيام
مش هيفرق جوه منك
غير شوية إهتمام
يعني تفرح ولا تحزن
تلقى حبة إحترام
بس خدها نصيحة مني
لما تيجي تروح تنام
راحة النفس وضميرك
ليك مراية في الأمام
لما تيجي تبص ليهم
تملى وشك بإبتسام
والحياة عندك جميلة
والبساطة والطيابة هما قمة الوئام
🌹🌹🌹🌹🌹🌹🌹🌹🌹🌹🌹🌹🌹🌹
كن طيب مهما رأيت في دنيانا من الناس فالطيبون
على نواياهم يرزقون
شادوليات
شاذلي محمد عبدالرحمن حسين
تعليقات
إرسال تعليق