((( عيد الأضحى )))
كنا زمان واحنا عيال
يجي علينا الاضحي نغني
نخرج بره كده ونهني
عمي سعيد وام تهاني
وكل واحد عنده أماني
كنا نشغل راديو البيت
كان متعلق جنب الحيط
كنا نكبر طول اليوم
واحنا معاه بندعي الله
نكبر قوي جوه البيت
كنا نلف كما ع الحاره
نهنئ الجار و نهني الجاره
كنا بنعمل دوشه وغاره
كنا نمأمأ بكره العيد
والقلب فرحان وسعيد
ونحارب ف خروف العيد
طح يا نطح يا خروف نطح
كنا نحس بفرحه أكيد
و نجهز في لبس جديد
كانت عاده ف آيها عيد
كنت أنادي قوموا ياأخواتي
أصحوا بسرعه نصلي العيد
يالله هانلبس لبس جديد
كنا نسلم ونبوس ماما
ونعيد علي جدوا وتيته
كنا بنصحي نعمل زيطه
ونصبح علي بابا ونعيد
وبسرعه يدينا عيديه
مصروف جيب وبوسه هديه
كنا في ايديه نمشي ونركب
و نزور أقاربنا لما نتعب
عاده ولازم نعمل بيها
مانخليش ولا جار م الجيره
إلا أن عدنا عليه ف الديره
أما الان الكل ف حيره
اخ واخته و متخاصمين
وابن وخاله و متعاركين
واولاد عمه متنازعين
ده طمعان ف ورث اخوه
وده عايز ورث أبوه
فين الرحمه ياخلق ياهووه
عيد ورا عيد بيعدي علينا
وكل خلاف بيفرق بينا
نخسر فيه دينا واهالينا
خلوا الحب يدفي قلوبنا
ويداوي جروح ليالينا
دعوه نوصل فيها ارحامنا
ف عيد الاضحي ولاهالينا
كلمات الشاعر/ السيد علي القن
مصر .ك.ب. 19/7/2021
تعليقات
إرسال تعليق