بوسوا الايدين واحمدوا
بوسوا الايدين وش وضهر
علي الصحة والعافية
فى ناس لا قادر تاكل ولا تشرب
وبتمشى بالعافية
زعلان لانك فقير دقة وبتعانى
والفكة مش كافية
الرزق قل بطران حكمته احمده
رحمة ربنا واسعة
الصحة لو راحت عمرالفلوس
لا شافعة ولا نافعة
لك جوز عيون بتشوف بها وودان
مطقطةه وسامعة
ورجل ماشى عليها فريرة سليمة
شايلاك ولا ممانعة
عندك عيال وزوجة لما يشوفوك
بيطيروا من الفرحة
وناس بتسال عليك ينشغلوا لو
غبت عنهم لو لحظة
غيرك لا لاقى السند ولا عنده الولد
مقطوع من شجرة
حاطط ايديك على خدك وبتشتكى
من امور فارغة
لحمدت ربنا عالعيال و الزوجة
ولاالصحة والعافية
وباصص للى فى ايد الناس وعايزها
مخلصة وخالصة
الدنيا من ده وده بتاخد وتدى
لا مكدرة ولا صافية
وكون عبد شاكر وحامد تحمد ربنا
فى السارة والضارة
الشاعر /عبد المنعم حمدي رضوان
تعليقات
إرسال تعليق