/////////+++عشقي+++/////////
عشقي وهوايا كلهم فيك
في بالي ومصورة ليا
في حضنك لالة وبين يديك
يالمفوجاها اعليا
محلاك ياعمري ف هذا الكون
والنسمة بمحبة ثغري
انت الشحرورة ف كل لسون
وحياتي وكامنة في صدري
دكالة والما فيك جاري
والحسن غراس دالية وعنقود
اسهولك جميلة خير ساري
سبحان الله رحمة وسدود
فيك الجلسة حلوة موالفاك
ياحبيبة يازينة لحقول
عشقك يالالة يسحر بهاك
كل مافيك دكالة مقبول
شفت فيك الولد معلي
يجني ف السلة سر الكرمة
والدالية ولعنب لمدلي
خير الله ربي بالعرمة
جطيوة عالية والنسمة
والريح يداعب غصان لشجار
لمكان زين ياخويا بسمة
ياجميلة ياجالبة لنظار
هاكل مافيك لالة وجميل
سالباني بحروف المبسم
يامبرية بنقاوة لعليل
محلاك يالزين لينا تسلم
رفقي بيا العين عشاقة
ديك لخضورة على شوفة العين
رفقي بيا العين ذواقة
هاهذي حكمة مول الزين
منك اولاد فرج اعزيزة
شلى قبايل ياك مجموعين
براد والكاس برزيزة
والاولية كلهم حاضرين
ياك تستاهلي لعمر والروح
يادكالة ومبرعاني
ماعندي فين نمشي ونروح
وبكل مافيك مونساني
بقلم صقر الحروف الزجال المحجوب بوسبولة
تعليقات
إرسال تعليق