الجرح
الجرح مش دم سايل
تربطه بالشاش
مهما العروق تنتفض
والنزف صار رشاش
لو حتي فاض الألم
أو صابنا بالرعاش
وجزعنا من قسوته
وطفح علي الأوشاش
مع غرزتين بينتهي
وكأنه قبل مجاش
الجرح غير دا ودا
صاحبه إسألوه
لوعاش
الجرح وشم بيطبع
في الروح
يفضل لهيب يشتعل
للقبر مايهداش
ملهش طب ابد
ولا طبيب يداويه
ممكن بيهدي الألم
لكن محال ينحاش
الجرح ظلم الأحبه
والصحاب والناس
والأهل لما نسوك
وسكنت في الأحراش
والوحده في شدتك
ومراره الإحساس
والحوجه بعد الغني
للي بنيت له أساس
والدين ملا صفحتك
وجايبلك الكراس
وغدر اهل الثقه
لما بعوك ببلاش
احـمد محمود عوض سعيد
الرحامنه ـ فارسكور ـ دمياط
تعليقات
إرسال تعليق