11 . ❤️ ملناش تمن ❤️
***************
هوه إحنا ليه ملناش تمن 🗨️ عند الليالي والزمن
أرخص ما فينا عمرنا 💭 وجراحنا مشتاقة لكفن
مستخسرين فينا الحياة 💭 والأهه طالعة بألف أه
تجرح قلوبنا ودمعنا 💭 وتداوي فينا جرحنا
بس بجراح فوق الجراح
عايشين حياري من سنين 💭 والفرح أصبح مية أنين
والعمر راح ويا اللي راح
إحساسنا مات من غلبنا 💭 والذكريات قالت لنا
ياترضوا بالعمر اللي فات 💭 ياتبقوا ماضي زينا
هوه إحنا مين ولا إحنا إيه 💭 عايشين زمان ضربة إيديه
بتهد فينا والألم 💭 من يأسنا صابه الألم
ودموعه نزلت من سكات
ع الحزن سايب ميت دليل 💭 والحلم أصبح مستحيل
والصبح أعلن إنه مات
يا ما إشتكينا والزمان 💭 رافض يقول آن الأوان
بكرة يقرب مننا 💭 ونعيش ساعات فيها الأمان
ماشيين طريق مليان جروح 💭 وماعدش فينا أي روح
ترسم لنا بسمة أمل 💭 وتقول لنا الحلم إكتمل
عشان نعيشه ولو ليوم
أيامنا غرقانة ف أسي 💭 والجرح جوانا إتنسي
ومالوش طبيب غير الهموم
يا دنية الأمل السخيف 💭 العمر فيكي شيء مخيف
مبيدناش غير الجراح 💭 وقصادها حاطط حد سيف
يانرضي بالموت البطئ 💭 يا نمشي ضالين الطريق
متغربين يوم فرحنا 💭 متجمعين يوم جراحنا
متعللين إن القدر
فارض علينا قوته 💭 وقلوبنا خاضعة لكلمته
حتي الدموع بتروح هدر
رافضين يا دنيا نكون تراب 💭 مع إننا خلق التراب
بس إحنا أفضل من خلق 💭 رب العباد تحت السحاب
متزوديش جرح القلوب 💭 متقربيش وقت الغروب
لو فيكي مخلوق من عدم 💭 تحت التراب يوم إتردم
وروحه فيه حيكون أنا
متخلناش نعشق نموت 💭 متذلناش دا الذل موت
لو عشنا فيكي ميت سنة
في وجودنا معنى اللا وجود 💭
في ردودنا زيف ملهوش حدود
لابسين سواد فوق السواد 💭 يعلن وفاة كل الردود
أدي الحكاية كلها 💭 عايشين عرايا ف ضلها
كاتبة الأسامي بدمنا 💭 وواخدة نقطة ضعفنا
تشهد علينا عشان نبيع
وإحنا اللي أضعف م الضعيف 💭
رافضين يكون فصل الخريف
شاهد علي وقت الربيع
🗯️ أشعار : بسام أبو مصطفي 🗯️
تعليقات
إرسال تعليق