حبيبى مطَلَّع روحى
==========
مع اِنَّك توأم روحى
بس انت مطلَّع روحى !!!
لو رُقت تقل لى تعالِى
لو تِغضب اِمشِى و روحى
لو رايق تِبقَى مَلاك
و الاقينى هوايا مَلاك
تِغضب بِتهِدّ الدنيا
ألاقيك بركان هَلاك !!!
حُبَّك أنهار أنهار
و فْ عِشقَك أنا أنهار
و اللحظة معاك أعمار
و فْ غضبك تصبح نار !!!
راجل اِنتَ مجَنِّنى
يا مالِى لى العين و النِنِّى
لو رايق أرقُص أغَنِّى
لو عصبى بتِقلِب جِنِّى !!!
من عِشقَك اقول آه يانى
و أموت و أقول لك تانى
و تقول لى حرام عليكى
مقتول انا و انتِ الجانى !!!
راح اموت مِنِّك و عليكى
و انا كلى منى و ليكى
اسقينى نقطة حب
و انا نهر الحب اسقيكى
مجنون و عاجِبنى جنانَك
و حنون و اشتاق لحنانك
لو تِشرب بُق القهوة
تلاقينى هنا فْ فنجانك
يا حبيبى هواك دغدغنى
و كلامك بيزَغزَغنى
من همسَك اقول الآه
و لا مليون شاعر يِغْنِى
عاشقاك يا حبيبى يا رِقَّه
و بَخاف لو تِقلِب فجأة
بس بيغفر لك عندى
ان انت مشاعرَك صادْقة
و لا عندك اتنين وِش
وِ فْ كِدب لا ليك وَ لا غِش
و كأنَّك طفل كبير
وِ كبيرَك تاخُد دُش
تِرجَع رايِق علطول
و البال لو كان مشغول
بالكِلمَة الحِلوة تجيلى
آجى ف حُضنَك علطول 🤗
راح احِبَّك اِنتَ و بَس
هاتحِس هوايا و احِس
لو مرة أقول لَك No
مِيت مرة تقول لى Yes 🙃 ... بقلمى / سوزان محمد ☺️
تعليقات
إرسال تعليق