أنا قلبي أبيض //الشاعر تامر محمد

أنا قلبي أبيض خام و بخاف يبات مغلوب
مش حمل تقل هزار أو حتى كسر قلوب
تلاقيه في إيديك عصفور تضحكله بيكركر
و ساعات بيرجعلي و ف خيبته بيجرجر
دعيت عليك بالعشق اللي يشيبك بدري
و اللي تلاقيك تكسرك من حيث لا تدري
أنا قلبي يوم ما اتولد فتحتله المندل
حصنته م الشحططة و رقيته م المنجل
 و جاي يا عيني عليك تقولي حبيتها
 ‏قابل ياعم النكد  حمل بقى و شيل
 ‏أديك أهو إتكعبلت أما بصحيح عيل 
 ‏عملت نفسي حجاب من كل شىء يأذيك
 ‏و كنت ستر و غطا و و دمي يرخص ليك
 ‏و شيلت عنك هموم  و بروحي كنت أفديك
 ‏فتحت باب للهوا و تقولي حبيتها !
 ‏دي بكلمة هتجيبك و بكلمة هتوديك
 ‏ضمنت مناديل ورق و في ثانية بلتها
يا ابني إنت مش زيهم و العشق بيره غويط
و إنت يا عيني عليك ملكش في التنطيط
دورك يا عم الروش تدق في ضلوعي
خليت عنيا تبات غرقانة في دموعي
و تخلي عندك دم و تخاف على نفسك
و اياك أشوفك يوم خرجت عن طوعي
من حقي قبل ما أنام أخاف تبات مغلوب
متكونش منديل ورق خليك إزاز شفاف
ملكش في البهدلة او حتى كسر قلوب

تامر محمد